tauaki whainga

whaia te ara tua
Follow the path that leads to success

Me hopu o ringa ki te aka matua
Hold firmly to the true vine

he toi whakairo, he mana tangata
Where there is excellence there is dignity

he korerotanga ma nga matua

He kura a iwi matou, Te kura o Ōmanaia, ā, he Kura Maori, he Kura Rumaki Reo Māori matou i roto i ngā tau 0 ki te 8. E ūhia nei te kura e te anga o te Marautanga o Aotearoa me te Marau a Kura
(Te Aka Matua) o Omanaia. No reira, ko te reo matua i roto i nga kaupapa ako, me nga marau aho -- ko te reo Māori te tuatahi. ​
Ko to matou Marau a Kura, he tuhinga tēnei e honotahi ana ki ngā marautanga ako ki te kawa o nga Hapū o Ōmanaia, ko Ngāti Hau me Ngāti Kaharau me kī. Ko te Ōmanaiatanga te pūtake o tēnei marau hei tuarā mo ngā akoranga katoa. A, he tini ngā āhuatanga hei hakatōkia ai ngā ūaratanga, ngā mātāpono hoki ki roto i te ngākau me te hinengaro o wā tātou tamariki mokopuna, kia korekore rātou e warewaretia nei, ko wai rātou, no hea mai rātou. He mea hakanuia ai i te mana, te tapu, me te mauri o ngā tamariki katoa me wō rātou tūrangawaewae o roto i wō rātou hapū, puta noa, puta noa.

He hononga ki te whakatauki o te kura me te tutohinga o te kura

I tangohia mai ngā rapunga hakaaro o te Whare Tapawha o Tā Mason Durie hei arahina mai i to matou aro whānui arā ko te "live and learn as Maori", "participate as citizens of the world" and "to enjoy a high standard of health and healthy living". Ko te hakatauki o to mātou nei kura he ekenga pānuku wā mātou tirohanga kia eke ki te taumata pūmanawa i roto i te ao matauranga me te ao hurihuri nei. E tautohu ana a Ngati Kaharau me Ngati Hau ki ngā maunga e rua, ko "Nga Puke Haua me Puke Huia" e honohono nei i ngā pae tihi o te maunga a Te Ramaroa e whātorongia atu ra ki te pūahatanga o Hokianga i kitea mai ra e Kupe, i te wā tatu mai ia ki Aotearoa nei. E akiaki ana te ngako o te hakatauki kia whai ake ngā tamariki kia toa ai i roto i wāna huarahi matauranga. Ā tōna wā, ka tau atu. Koia tēnei te mahi, me te moemoeā o te Poari matua -- ka hakaratongia e rātou he huarahi e tika ana mo te kura o Ōmanaia.

nga haepapa a whanau

He mea kōkiri te Kura o Ōmanaia e te whānau, ā, he wāhi nui ō koutou ki te Tihi o Angitū. E pai ai te rere o ngā mahi a te kura, me mātua whai wāhi mai koutou.
Ko te reo Māori te reo kawe i ngā haerenga katoa a te Kura. He mea nui anō ki te maimoatia, ki te akiaki i ngā tamariki i te kāinga i ngā wā katoa ki te reo Māori i te kāinga.
​Me mātua tae ngā whānau katoa ki ngā tākaro ā kura, ngā hui whānau, ngā hui ā kura, ngā haerenga, ngā noho marae, ngā noho kura me ngā hui whai ā pūtea.

E pūareare nei to mātou kura kia uru mai ngā mema o te whānau, tirotiro haere ai ki nga āhua o tō mātou kura. E hōmiromiro ana kia noho mai ngā kaumatua, kuia, mātua anō hoki ki te taha o wā rātou mokopuna ki te awhi, ki te hāpai i a rātou noki i roto i te akomanga.

he kura hauora

He kura hauora mātou. E hapahāpai ana ki ngā tikanga o te hauoratanga o te tangata, arā, ko te taha tinana, ko te taha wairua, ko te taha hinengaro hoki. He kura auahi kore, he kura e whakatairanga ana te pakari tinana ma te korikori a te tinana me te hākinakina. Kaare mātou he toa hei hoko kai engari he ngaruiti, he pouaka matao to mātou hei whakamāhanatia, hei whakamataohia ōu kai.
Kāore mātou e tautokohia ana ngā kai paraurehe pēnei i te wai-reka, kai rare me wēra atu o ngā momo e kore e pai nei mo te hauora o te tinana. 
Ia Mane, ia Wenerei ka whiwhi mātou he hua rākau mā ngā tamariki katoa. He mea tautoko na te rōpū whakahaere o Fruit in Schools. 
Kei a mātou anō he maara kai mo te hakatō me te hauhake i ngā momo kai whenua. He maha hoki ngā momo hua rākau e tupu ana i roto i tā mātou kura.
E tino tūturu hoki mātou ki te wāku niho i muri atu i te kai tīna ia ra, ia ra. Na te kura e hokohoko nei ngā paraihe niho me te pēniho ma ia tamaiti. 
Ka whiwhi hoki mātou he kai, he kākahu. he miraka me te wītipīki na te rōpū whakahaere a Kids Can. No muri atu i te kori tinana i te ata, ka whakaritea he kai parakuihi mā ngā tamariki ia ata, ia ata. 

marautanga

Ko te Marautanga o Aotearoa te anga me te tuarā o ngā akoranga katoa. Ka whakaritea ngā kaiako me te poari matua hoki ngā whainga-ā-tau kia whakapikingia te taumata ako a ia tamaiti ia tau, ia tau.  Ka rironga mai te poari matua he ripoata e whakaatu ana i ngā whanaketanga ako o ia tamaiti. Arā ko ngā tūmomo kaupapa ako e noho nei i raro i te Marautanga o Aotearoa: Ko te Reo Māori, ko te Pangarau, ko te Tikanga ā Iwi, ko te Pūtaiao, ko te Hangarau, ko Ngā Toi, ko te Hauora me Te Reo Matatini. Ka hakamatautauhia ngā pia mā ngā momo aromatawai e hangai ana ki te taumata e tika ana mō rātou katoa ngā tauira. Ma te tātaringa o ngā aromatawai ka tuku ripoata atu ngā whakanetanga o tāu tamaiti (wāu tamariki pea). E rua ngā wāhanga o te tau e whakarite ana he ripoatatanga mā ngā mātua. 

hANGARAU

E kōmitimiti ana ngā mōmō hangarau pēnei i te rorohiko, papahiko, i-papa, aha atu, aha atu. E toro whānuitia atu mātou he rauemi e pēnei ana hei kura taiao i-ako. 

ma nga tamariki e huritaungia ana ki mua i te 5 tau pakeke

E tautokohia ana kia tae mai ngā tamariki e huri tata ana ki te 5 tau pakeke. Engari me noho tahi ngā matua ki te taha o wāu tamariki i aua wā tonu. 
E pai mo te 2 marama i mua rā o tōna huritau ki te haere mai ki te ruma teina (tau 0-2). Ko te tikanga ia nei, ko te Rāmere te wā e papai ana mā ngā nohinohi kia tae mai.

Rehitatanga mo te kura

 Ka rumakina ngā tamariki me ngā kaiako i te reo Māori me ngā tikanga Māori noki. 
Ko te nuinga o ngā tamariki - i haere mai no kura auraki kē. No reira, ko te reo Pākeha, te reo matua ki a rātou. Hēoi, e tika ana kia noho to tātou kura hei kura ā iwi. Ko te hakaaro tonu nei -- ka hakapikingia, ka poipoia me te whanaketia ai i te reo Māori kia pūāwaitia.
Taria te wā, ka kitea rātou ngā tamariki i ngā huarahi e rua e taea ai anō rātou te hikoia, a, ka whātuitui ai ngā reo e rua hei hakaarahina i a rātou i ngā ao e rua, a, ko te ao Māori, ko te ao hurihuri wērā.

nga kohi putea mo te kura

Kāore he utu ma te whānau ki te hoko rauemi pērā i ngā pukapuka tuhituhi, pene me wērā atu o ngā rawa. Hei te timatatanga o ia tau - ka hoatungia te kura he kete rauemi ma ia tamaiti. Horekau he utu, horekau he koha. Engari, ki te hiahia koe he rauemi atu i wēnei, kei a koutou tērā. Ina ka pauhia nga rauemi e ngā tamariki, mā te kura anō e tākoha atu.

EOTC

He wāhi tapatahi te EOTC ki roto i tō mātou marautanga ā Ōmanaia. Kua ata hakaritea ngā māhere o ngā haerenga katoa i waho kē i te kura. Kua hono tahi ngā kaupapa here me ōna kawenga ki ngā whakaritenga o ngā haerenga hei ūhia mā ngā kaiako me ngā kaiwhakahaere. Mā te tuhinga RAMS ka whakamōhio atu ki ngā mātua o ngā tamariki te kaupapa o te haerenga, ōna taketake, ōna māhere haumaru me ōna tupatoranga hoki. Wētahi wā ka rapuhia e mātou ki ngā tangata e taea ana te awhi i a mātou ki te heria ngā tamariki ki wāhi kē. 

te piiti marae

E waimārie anō mātou te kura o Ōmanaia kia noho tata rawa ki te marae o Te Piiti. He mea tikanga mō mātou ki te haereere mātou ki te marae ki te tautokohia ngā kaupapa whakahirahira ki ngā momo huinga ki reira. He mea nui anō kia matou ki te haere ki ngā tangihanga ki te kawea ngā tikanga i te marae. He mea anō kia kitea, kia rongohia, kia puritia te reo e rere ana me ōna nei tikanga me ngā kawa hoki o te marae. 
Ia tau, ia tau ka noho te kura o Ōmanaia ki te marae i te wāhanga 1 me te wāhanga 4 hei whakawhanaunga i a tātou anō me te whakaako i ngā kōrero, ngā hītori mo Ōmanaia katoa. 

Tae a kura

Me whai e ngā akonga ki te tae ā tinana mai ki te kura ia ra, ia ra. Ka whai atu te tari i te tīpakopako haere a ngā tamariki ki ngā mātua o ia tamaiti mā te waea atu engari ki te kore ōna mātua te whākina mai he aha e kore tae mai ai te tamaiti, ka tohungia hei "kore he take"  mo taua rā tonu. No reira, ko te tikanga nei, me toro mai ki te kura ma te waea, ma te tuhi pānui raini kia mōhio mai te tari he aha e ngaro ai te tamaiti i te kura. 
Heoi, ko te 90% atu te whāinga o te tae-a-tinana mai mō ngā tamariki ki te kura ia tau.

haumarutanga

E whiwhi tiwhikete haumarutanga ngā kaiako me ngā kaihāpai o te kura nei. Mehemea ka whara te tamaiti i te aha atu rānei, ma te kaiako e poipoia. 
Noa nei anō te kōrero mēnā e pāwhati ana, e pāmamae ana te wharatanga o te tamaiti, ka waea atu ki te whānau te tuatahi, tuarua ka taria atu ki te hohipera mēnā he kōwhiringa na ōna mātua me ōna kaiako ka tika.

te kohanga o karatia

He whānau kōtahi te kura o Ōmanaia me te kohanga nohinohi o Karatia.
E kaha tautoko nei i wā rātou kaupapa katoa, pērā anō rātou ki a mātou kura.
Ka tuwherahia te kohanga ia Rāhina, ia Rāapa me ia Rāmere tonu mai i te 10am ki te 1pm ngā haora.

he momo atu ano

Ngā Hararei Tūmatanui

Ka kapi te kura i ēnei rā
Te Rā o Waitangi - Rāhina 6 Huitanguru
Te Huritau o te Kuīni - Rāhina 5 Pipiri
Te Rā o Reipā - Rāhina 23 Whiringa-ā-nuku

Ngā Haora o te Kura

8:30am - Karakia
9:00am - Wāhanga tuatahi
11:00am - Paramanawa
11.30pm - 1.00pm - Wāhanga tuarua
1:00pm – 1:45pm - Wā Tīna
1:45pm - Wāhanga tuatoru
2:45pm - Ka mutu te kura
Ngā Kākahu Rite

Me whai e ngā ākonga katoa ngā kākahu rite o te kura.
Ka taea te hokohoko kākahu i te tari o te kura

Kura polo pākurakura/pīngao hei $30 ma ia
Kura pōraka mangu hei $36 ma ia
Tarau poto mangu hei $31 ma ia (Ka taea hoki te hokohoko ēnei i tētahi atu toa hokohoko)
Hakete mangu hei $86 ma ia (Ka taea hoki te hokohoko ēnei i tētahi atu toa hokohoko) 
Hū, tōkena, hirīpa mangu (Ka taea hoki te hokohoko ēnei i tētahi atu toa hokohoko)

Ko te tikanga nei, me whakautungia katoatia tō pūtea i mua tonu i te whiwhinga o ngā kākahu rite mo te kura. He kōwhiringa anō mēnā e kore e taea te utu-ā-moni i te katoa mō ngā kākahu. Patapātaingia atu ki te tari mēnā he take anō wāu hei hakaritea ai te whakaeaea mai te utu. 

Ānei hoki te peka mo te utu-ā-ipurangi:
ASB - Omanaia kura - Te nama pūtea moni:
12-3091-0234147-00

omanaia, hokianga, waima, rawene