He mihi

Tēnei te mihi a Te Kura o Ōmanaia ki te hunga i taea ai te tāpae atu i tēnei whakahoutanga o Te Marautanga o Te Kura o Ōmanaia. Me mihi anō ki a rātou mā kua whetūrangitia, kua huri hoki ki te pae o maumahara ki te kainga tūturu hoki mo tātou te tangata; ko rātou i waiho mai i ā rātou kōrero me ngā taonga tuku iho hei whakatakoto i te ara hikoi e whaia ai e ngā mokopuna katoa e haramai ana ki tēnei kura o Ōmanaia. Nō reira, ahakoa kua ngaro atu rātou i te tirohanga kanohi, e kore rātou e warewaretia.
 
Me mihi hoki ki a tātou te hunga ora, e whakapau kaha ana ki te whakawhanake i wā tātau tamariki mokopuna kia tutuki ake ai i a rātou ngā hiahia me ngā wawata katoa e whakaarohia ana e rātou. Ko ngā kuia me ngā koroua wērā, ko ngā whānau me ngā hapū anō hoki wērā. Kāre e mutu ngā mihi ki a tātou katoa i runga i te āhuatanga o tēnei kaupapa, ko te oranga tonutanga o ngā reanga kei te piki ake nei i waenga i tō tātou iwi, i tō tātou hapori me tō tātou ao hurihuri hoki.
​​

PEPEHA

E noho ana au i te tomokanga o tōku whare.
Ka titiro ki te awa kōrero ō Tōukahawai. 
Ka rere arorangi au ki uta rā ko Taraire, ko Ahikawariki, ko Horotiu, ko Karatia, ko Taiwhakapiki
Kia tou iho ki runga i te tihi o Puke Huia rāua ko Nga Puke Haua ki te kanohi titiro ō Ngāti Kaharau me Ngāti Hau. 
E hāngai tonu taku hāere ki te riu o Ōmanaia.
​Mihi iho ana ki te tūpuna whare a Te Piiti.
Neke whakamuri atu ki te take rā o te maunga o Te Ramaroa.
Ka porotiti kia whiti atu i te awa ki Ōue ko Mangawhero tonu tō rere kia tae atu ki Hokianga Whakapau Karakia ki te wahapū ō Te Hokianga Nui a Kupe.
​
Tihei Mauri Ora!

---

what is a marau ā-kura?